Enrike Rikelme: Kloppni Real Madridga bosh murabbiy qilaman!

Madridning «Real» klubi prezidentligiga nomzod Enrike Rikelme, agar prezidentlik saylovlarida g’alaba qozonsa, «qaymoqranglilar»ning yangi bosh murabbiyi kim bo’lishini sensatsion tarzda e’lon qildi! Saylovlar 7-iyun kuni o’tadi.

«Real»dagi loyihamizda ko’rishni istayotgan bosh murabbiy – bu Yurgen Klopp! Dushanba kuni, agar biz saylovda g’olib chiqsak, direktorimiz Raul Klopp bilan bog’lanadi», — deya Rikelmening bu hayratlanarli so’zlarini jurnalist va insayder Fabritsio Romano X ijtimoiy tarmog’ida keltirdi.

Saylovlarda ikki nomzod – amaldagi prezident Florentino Peres hamda ispaniyalik tadbirkor Enrike Rikelme ishtirok etadi.

Kloppning so’nggi murabbiy faoliyati 2015-2024 yillarda «Liverpul»da bo’ldi. Uning boshchiligida «mersisaydliklar» Chempionlar Ligasini ham, Angliya chempionligini ham yutishgan! Avvalroq mutaxassis Dortmundning «Borussiya»sini boshqarib, Germaniya chempioni bo’lgan, milliy sovrinlar ham olgan. Hozir Klopp «Red Bull» guruhida sport direktori lavozimida ishlamoqda.